Рубрика: Պատումներ

Նախագիծ՝ «Հոգևոր կրթություն» 

2025 թ. մայիսի 8-ին «Մխիթար Սեբաստացի» կրթահամալիրի հետազոտական վարժարանի ընթերցասրահում կայացավ ևս մեկ հետաքրքիր հանդիպում Հովհաննես սարկավագի հետ։ Հանդիպմանը ներակ էին՝ կրթահամալիրի հիմնադիր տնօրեն Աշոտ Բլեյանը, հետազոտական վարժարանի ղեկավար Մարթա Ասատրյանը,  9-րդ և 10-րդ դասարանների նախագծային խմբերը, ուսուցիչներ և այլ հետաքրքրված անձինք։ Հովհաննես սարկավագը խորհուրդ տվեց աստվածաշնչի ընթերցումները սկսել Ղուկասի ավետարանից և խորությամբ ներկայացրեց այն։

Ուշագրավ էր նաև, որ սարկավագը անդրադարձավ Հիսուսի մի հայտնի արտահայտության, որը հաճախ սխալ է ընկալվում՝ «Եթե մեկը քո աջ այտին ապտակ տա, նրան մյո՛ւսն էլ դարձրու»։ Նա բացատրեց, որ սա կոչ չէ թույլ ու անպաշտպան լինելու, այլ խորը հոգևոր խորհուրդ ունի՝ չպատասխանել չարին չարով, չվրեժխնդիր լինել, այլ զսպել վրեժի բնազդը և հաղթահարել բռնությունը խաղաղությամբ։

Անպակաս չմնաց անդրադարձը հայերին և այն փաստին որ հայերն են առաջինը կրոնը բերել քաղաքական դաշտ։

Հատուկ շնորհակալություն բոլոր կազմակերպիչներին և Հովհաննես սարկավագին այս հիանալի նախաձեռնությունը կյանքի կոչելու համար։

Սույն թվականի ապրիլի 17-ին «Մխիթար Սեբաստացի» կրթահամալիրի ավագ դպրոց վարժարանի 9-12-րդ դասարանների սովորողների մասնակցությամբ իրականացվեց ճանաչողական այց Կոմիտասի անվան պանթեոն և Կարեն Դեմիրճյանի թանգարան հարգանքի տուրք մատուցելու Մեծ գործչի 93- ամյակին։

Ճամփորդությունն անցկացվեց «Կարեն Դեմիրճյանի 93-ամյակին նվիրված այցելություն թանգարան և Կոմիտասի անվան պանթեոն» նախագծի շրջանակում, որը մշակվել էր «Կարեն Դեմիրճյանը հանուն Հայաստանի» թեմայով իրականացված հետազոտական աշխատանքի արդյունքների հիման վրա։

Մեկնեցինք ժամը 12։30-ին, իսկ ժամը 13։00-ին հասանք Կոմիտասի անվան պանթեոն՝ հարգանքի տուրք մատուցելու Կարեն Դեմիրճյանի հիշատակին։ Սովորողները ծաղիկներ դրեցին մեծ գործչի շիրիմին և արժանին մատուցեցին նրա կատարած ազգային, պետական ու հասարակական վաստակին։

14:00 Կարեն Դեմիրճյանի թանգարանում սկսվեց ուսումնաճանաչողական շրջայցը, որի ընթացքում մասնակիցները հնարավորություն ունեցան ծանոթանալու Կարեն Դեմիրճյանի կյանքին, գործունեությանը, նրա թողած ժառանգությանը և հայոց նորագույն պատմության կարևոր իրադարձություններին։ Շրջայցն իրականացրեց 10-րդ դասարանի սովորող Կարինե Դադոյանը, ով հանդես եկավ որպես էքսկուրսավար՝ ներկայացնելով թանգարանում ցուցադրված նյութերը, պատմական փաստաթղթերը, լուսանկարներն ու արժեքավոր տեղեկությունները՝ միաժամանակ կատարելով դրանց վերլուծություն։

Ճամփորդության ընթացքում սովորողների մոտ ձևավորվեց հարգալից վերաբերմունք ազգային հերոսների և պատմական գործիչների նկատմամբ։ Նրանք ծանոթացան Կարեն Դեմիրճյանի գործունեությանը և արժեհամակարգին՝ ստանալով ամբողջական պատկերացում նրա թողած ժառանգության մասին։ Այցելությունն ընդգծեց թանգարանային կրթության դերը և նման միջոցառումների կարևորությունը հայրենասիրական դաստիարակության մեջ։ Ճամփորդությունը դարձավ հնարավորություն՝ գիտելիքները խորացնելու, նոր փորձ ձեռք բերելու և պատմության հանդեպ գիտակցությունը զարգացնելու համար։

Սովորողների պատումներ՝
Սաթինե Սահակյան 10-րդ դասարան

Սույն թվականի ապրիլի 10-ին «Մխիթար Սեբաստացի» կրթահամալիրի հետազոտական վարժարանի ընթերցասրահում տեղի ունեցավ ևս մեկ ուշագրավ հանդիպում Հովհաննես սարկավագի հետ։ Զրույցի ընթացքում սովորողներին ընձեռնվեց բացառիկ հնարավորություն՝ խորությամբ ծանոթանալու Աստծո Տասը պատվիրանների իմաստին և դրանց կիրառությանը մեր առօրյա կյանքում։ Չնայած սեղմ ժամանակին՝ սարկավագը հասցրեց անդրադառնալ միայն առաջին հինգ պատվիրաններին՝ խոստանալով հաջորդ հանդիպման ժամանակ ներկայացնել մնացածը։

Համոզված եմ, որ նման հանդիպումները շատ մեծ նշանակություն ունեն մեր՝ երիտասարդ սերնդի հոգևոր զարգացման համար։

Սույն թվականի ապրիլի 9-ին, ժամը 13:00-ից 14:20-ը, Տիգրան Հայրապետյան գրադարանում կայացավ հետաքրքիր և արժեքավոր հանդիպում՝ կազմակերպված հասարակագիտական մասնախմբի կողմից։ Հանդիպման հատուկ հյուրը ՀՀ ԳԱԱ Հնագիտության և ազգագրության ինստիտուտի գիտաշխատող Վարդուհի Գրիգորյանն էր։

Շարունակել կարդալ

Սույն թվականի ապրիլի 3-ին «Մխիթար Սեբաստացի» կրթահամալիրի հետազոտական վարժարանի ընթերցասրահում տեղի ունեցավ ուշագրավ հանդիպում Հովհաննես սարկավագի հետ։ Զրույցի ընթացքում սովորողներին ընձեռնվեց բացառիկ հնարավորություն՝ խորությամբ ծանոթանալու Մեծ Պահքի խորհրդին, դրա վեց կիրակիներին և ոչ աշխարհիկ իմաստին։

Հովհաննես սարկավագ բացատրեց, որ Մեծ Պահքը պարզապես սննդից զերծ մնալու գործընթաց չէ։ Այն հոգևոր խորքային ճանապարհ է՝ ուղղված մարդու ինքնակատարելագործմանը և կամքի զօրացմանը։ Նրա խոսքով՝ պահքի իսկական նպատակը ոչ թե ֆիզիկական սահմանափակումն է, այլ՝ ինքնազսպման միջոցով ներաշխարհը վերափոխելու ձգտումը։

Քննարկման ժամանակ մասնակիցները ծանոթացան Մեծ Պահքի վեց կիրակիների խորհրդին, որոնցից յուրաքանչյուրն ունի իր յուրահատուկ իմաստը՝ ուղենշելով քրիստոնյայի հոգևոր ուղին։ Զրույցի ընթացքում անդրադարձ եղավ նաև այն մտքին, որ պահքը լավագույն առիթն է ինքնաքննության, ներողամտության, աղոթքի և ներքին հանգստության հասնելու համար։

Քանի որ զրույցը շարունակական բնույթ է կրում, որպես սովորող ցանկանում եմ առաջարկել մի քանի հետաքրքիր հարցեր, որոնք կարող են հիմք հանդիսանալ ապագա հանդիպումների համար և նպաստել առավել բովանդակալից քննարկումների կայացմանը։

Հարցեր՝

Ո՞րն է Աստծո Տասը պատվիրանների խորքային նշանակությունը, և ինչպես են դրանք կիրառվում մեր առօրյայում։

Ինչպիսի՞ հագուստ պետք է կրել եկեղեցում։

Ինչպե՞ս է ճիշտ ողջունել և դիմել քահանային։

Ո՞րն է լավագույն ձևը Աստվածաշնչի ընթերցանությունը սկսելու համար։ Ինչ խորհուրդներ կտայիք սկսնակ ընթերցողներին։

Սույն թվականի մարտի 19-ին <<Մխիթար Սեբաստացի>> կրթահամալիրի Հետազոտական վարժարանի ընթերցասրահում հանդիպում ունեցանք իրավաբան Արամ Օրբելյանի հետ ։ Հանդիպմանը մասնակցում էին 10-12-րդ դասարանների պատմության ընտրությամբ խմբերի սովորողներ, ինչպես նաև նրանք, ովքեր հետաքրքրված են իրավաբանությամբ, քաղաքագիտությամբ և դիվանագիտությամբ։

Շարունակել կարդալ

Սույն թվականի մարտի 13-ին տեղի ունեցավ ճանաչողական այց Կարեն Դեմիրճյանի թանգարան՝ 9-12-րդ դասարանների սովորողների մասնակցությամբ։ Ճամփորդությունն իրականացվեց պատմության ուսումնասիրման գործնական ձևաչափով՝ հնարավորություն տալով մասնակիցներին առավել խորությամբ ծանոթանալ Կարեն Դեմիրճյանի կյանքին, գործունեությանը և նրա թողած ժառանգությանը։

ՇԱՐՈՒՆԱԿԵԼ ԿԱՐԴԱԼ

Սույն թվականի մարտի 7-ին <<Մխիթար Սեբաստացի>> Հետազոտական վարժարանի ընթերցասրահում տեղի ունեցավ հանդիպում ՀՀ Ազգային ժողովի պատգամավոր, Եվրոպական ինտեգրման հարցերի մշտական հանձնաժողովի նախագահ Արման Եղոյանի հետ։ Հանդիպման նպատակն էր քննարկել հասարակագիտական կրթության դերը, Հայաստանի դիվանագիտական մարտահրավերները և եվրոպական ինտեգրման գործընթացները։

շարունակել կարդալ